Frantziako Gobernuko ordezkarien etorreraren aurka mobilizatzeko deia egin dugu

“G7 EZ !” Euskal Herriko plataformak abenduaren 18an Biarritzen Frantziako Gobernuko ordezkariekin iraganen den G7 gailurra prestatzeko bilkuraren karietara mobilizatzera deitzen du, 12:30ean, Clémenceau plazan.

Duela gutti publikoki aurkeztu zen plataformak 2019ko agorril hondarrean Euskal Herrian iraganen den G7-ren aurka mobilizatzera deitu du, G7-k sinbolizatzen duen mundua errotik aldatu behar delako lehenbailehen. Frantses Estatuko aktualitate beroak horren premia agerian uzten du.

G7aren presentzia errefusatzearekin batera, aldaketa sozialaren aldarriari hauspoa eman nahiko du plataformak. Mobilizaziora deitu du beste eredu batzuen babesteko eta beste aterabide batzuk eraikitzeko, justizia soziala, elkartasuna eta berdintasuna oinarri eta errealitate konkretu izango dituen mundu baten alde.